Quand'arrivi alla colla d'Acquavona
quante funtane truovi: chilla''e Giallu,
de Surruscu e tanta'autre...'ntra la valla
l'acqua d'ille, calandu, ohhi cumu sona!
vuoscura 'ncutti, dilizia de friscura,
pratura virdi... 'na tranquillità:
chilla è la conca de Dicollatura,
e tu salutamilla, o Libertà!
Sutta de Riventinu, lu paisiellu
primu chi truovi ha nume Tumaini
(parrocchia 'e S. Bernardu) ed ha vicini
lu Canciellu, 'u Passaggiu, 'u Praticiellu,
Rumanu, e doppu sû le Casenove,
li Cerrisi e l'Addame de papà :
(l'Addame, chi d'uu core sue 'un se smove
ppe' tiempu e luntananza, o Libertà!)
Andandu, si tu passi pe' lu chianu
d''u Praticiellu, truovi 'u campusantu:
llà fermate a portare lomio chijantu
ali cari chi sutta terra stanu...
Cà, ccu tuttu ca si' “furasterella”
e nullu d'ili te canusce e sa,
la tua visita, o figliama mia bella,
ad illi de rifriscu le sarà.
All'Adame tu truovi zu Luice
ccu' zâ Maria e Marianna,
chi te cùntane d''a tua santa Nanna
(e vene de l'Accària zâ Filice):
Te mustranu li luochi chi lassai
tantu amati, chi forse 'un viju cchiù,
ma me cumpuorte ppemmu tu le sai
c'a fràtitta ed è sùorta 'e 'mpari tu.
Vasa ppe' mie d''a vecchia casa 'e mura
lu “cippariellu” mio d''u focularu,
le ziarelle, zu Luice caru,
sira e matina, cientu vota l'ura.
Circa 'ntra 'e carte de la livreria
'ncunu ricuordu d''a mia giuventù,
e sentirai l'adduru e l'armunia
de 'sta mia vita, chi nun vale cchiù.
Quande sienti sonare matutina,
zumpa d''u lietu, spalanca 'u barcune,
saluta 'u sule chi d''u Carigliune
s'auza maestusu allu cielu turchinu.
Oh qùante vota l'àdi salutatu,
quand'era virde... (ma...quant'anni fa?)
papà tuo ch'è mbecchiatu, no' cangiatu
e resta “calvrise”, o Libertà.
Pue te lieju 'ntra l'uocchi, quandu tuorni
li signi de la luoro amurusanza,
e me torna a jurire lasperanza
de finire ccud'illi li mie' juorni.
Tornanduce pue nue, tutti a 'na vota,
cchi gioia chi nun forra, o Libertà!
Speramu sempre: “'u mundu gira e vota”,
chi sa si 'u suonnu nun s'avvererà!
La redazione ha scelto “A mia figlia
Libertà” come prima poesia per inaugurare la rubrica giornaliera perché mostra
la visione unitaria del nostro Paese che aveva il Poeta nel ripensarlo da
Chicago: tale visione è assolutamente da rimarcare perché il frazionismo è
stato da sempre una piaga per Decollatura.
Un altro motivo è perché viene messo
in risalto il nome dato da Michele Pane alla figlia, LIBERTA’ e vien spontaneo
chiedersi chi poteva, ai primi del 1900 dare tale nome ad una figlia? Un
anarchico? un socialista? uno di quelli
che allora venivano bollati come sovversivi? Un libertario sognatore?
Forse rispondendo a queste domande si
riuscirà a capire perché Michele Pane è andato in America la prima volta da
ragazzo e poi vi è tornato definitivamente: ma questo è lavoro per gli storici e
non per la redazione di Deco Mag